Atlantic Pride
Co peche da quinta edición do festival Atlantic Pride na Coruña chegou a resolución sobre o III Certame de Literatura LGTBI+ que se convoca co evento. Luis Maceira Cid, co relato 'Instrucións previas', gaña o primeiro premio; mentres que Tamara Jiménez Quirós álzase co segundo, co texto 'Tan diferentes como iguais'; e Laura Souto Queijeiro acada a terceira posición con 'Como se xestiona unha crise'. As obras gañadoras, escritas todas en galego, orixinais e inéditas, de temática libre e con vinculación á diversidade LGTBI, recibirán premios en metálico de 600, 300 e 100 euros. Este concurso literario de relato curto sobre diversidade, que o Atlantic Pride organiza en colaboración coa Rede de Bibliotecas Municipais da Coruña, a través do club de lectura QUEERuña, rexistrou neste 2024 o seu récord de participación. O Certame de Literatura LGTBI+ naceu en 2022 para visibilizar as diversidades sexuais e de xénero e vivenciar as experiencias minorizadas de todas as persoas LGTBI+.