Ofrenda do Reino de Galicia. Foto: Concello de Lugo
En 1672 a Xunta do Reino de Galicia aprobou o donativo de 30.000 ducados para o culto ao Santísimo Sacramento da catedral de Lugo, principal elemento simbólico do templo. Desde entón, leva celebrándose ininterrompidamente a Ofrenda do Antigo Reino de Galicia, que congrega na cidade luguesa aos alcaldes das sete antigas capitais de provincia do reino de Galicia nun acto que preserva, con poucas alteracións, a súa estrutura orixinal. Agora a Xunta de Galicia acaba de incoar o procedemento para declarar Ben de Interese Cultural (BIC) a cerimonia, por tratarse dunha "celebración na que toda Galicia se ve representada, na que se une tanto a pate civil como a eclesiástica, nun só evento que supón un dos últimos expoñentes dese histórico Reino de Galicia, e unha das poucas manifestacións inmateriais vivas que evocan a entidade política histórica de Galicia que desapareceu administrativamente na primeira metade do século XIX".
