A Xunta declarará BIC a Ofrenda do Antigo Reino de Galicia

A Ofrenda do Antigo Reino de Galicia, que desde hai 350 anos reúne os representantes das sete antigas provincias do país na Catedral de Lugo será declarada Ben de Interese Cultural. Así o anunciou a Xunta de Galicia despois de que o conselleiro de Cultura e Turismo, Román Rodríguez, se reunise co bispo de Lugo, Alfonso Carrasco, este seis de febreiro. Segundo informa a Xunta, este acto constitúe unha "tradición cunha acreditada historicidade que salienta a función do patrimonio cultural inmaterial na sociedade como elemento de carácter identitario para o conxunto da Comunidade" e será recoñecida a instancias do Bispado.

A cerimonia celébrase desde 1668 no domingo seguinte ao Corpus Christi nun acto institucional e relixioso que conta cos mandatarios da Coruña, Lugo, Ourense, Santiago de Compostela, Mondoñedo, Betanzos e Tui. Desde 1925 o evento celébrase do mesmo xeito, cunha misa na catedral de Lugo coa presenza por rotación anual dun dos representantes municipais, a interpretación da Marcha Solemne do Antigo Reino de Galicia con gaitas en tres tonalidades e percusión e unha procesión pola cidade.

A orixe desta tradición está nun voto solemne que os rexedores fixeron en 1669, "ante as dificultades económicas da Catedral de Lugo, de dotala dunha renda anual coa que iluminar o Altar Maior", segundo lembra a Xunta. Nos últimos anos a celebración estivo envolta en certa polémica pola negativa de varios alcaldes do país a participar nun evento relixioso. Na actualidade a celebración está declarada Festa de Interese Turístico.