A Deputación da Coruña financiará proxectos sobre o Reino de Galicia

O Boletín Oficial da Provincia da Coruña deste 5 de xaneiro recolle a convocatoria do Fondo de proxectos culturais Reino de Galicia 2021-22. Esta iniciativa da Deputación nace co "obxectivo de contribuír á socialización do coñecemento e do interese pola historia, as figuras, os lugares e os momentos do Reino medieval de Galicia", un período que a entidade destaca como "verdadeira época de esplendor social, cultural e económico que, porén, se mantiña oculta á sociedade galega actual".

O fondo nace cun orzamento de 250.000 euros que se distribuirán en vinte galardóns cun máximo de 12.500 cada un. As bases establecen que se apoiarán "proxectos de todo tipo de soportes e formatos: libros, discos, publicacións divulgativas, audiovisuais, espectáculos ao vivo, exposicións, congresos e xornadas, materiais de merchandising, contidos dixitais, murais e intervencións urbanas, contidos lúdicos" que traten tanto a historia do Reino de Galicia medieval como "aspectos particulares e vinculados directamente a este (figuras históricas, espazos, épocas...)".

Poden presentarse á convocatoria persoas físicas e xurídicas que realicen traballos de investigación ou de divulgación con esta temática, e o prazo de solicitudes é dun mes a partir da publicación das axudas no sistema nacional de subvencións.