O humorista Antonio Fraguas Forges contará cun museo dedicado á súa figura na Fonsagrada, de onde era orixinario o seu pai. O Concello, con apoio do Goberno Central, iniciou os traballos para transformar o antigo consistorio da vila no Centro Cultural Forges en memoria dun dos referentes do humor gráfico estatal.
O proxecto conta cun investimento de 256.000 euros, dos cales 183.000 son achegas de fondos europeos Next Generation. A familia do humorista, falecido hai cinco anos, doou ao concello libros, debuxos orixinais e diferentes obxectos persoais que se exhibirán no novo centro de xeito permanente.
Ademais, o proxecto inclúe un espazo de información turística e un salón de actos que acollerá diferentes actividades culturais. Está previsto que as obras de acondicionamento finalicen o vindeiro mes de setembro.
