Tito Asorey e Vanesa Sotelo finalistas nos XXVII Premios Max

A montaxe 'Unha inimiga do pobo', coa que Talía Teatro adapta un clásico da dramaturxia como Henrik Ibsen foi a triunfadora da XXVIIIª edición dos Premios de Teatro María Casares e agora é a única proposta da escena galega que se mantén entre os finalistas dos 27 Premios MAX das artes escénicas estatais. É grazas ao traballo de adaptación do libreto orixinal de 1882 do noruegués Henrik Ibsen, levado a cabo por Tito Asorey e Vanesa Sotelo, e que xa foi premiado nos María Casares. Ambos chegan á fase final de tres finalistas para o galardón desa categoría. Atrás quedaron outras opcións galegas que se mantiveron na fase de candidaturas pero non pasaron da selección final do xurado. Os galardóns, organizados pola Fundación SGAE, entregaranse o vindeiro 1 de xullo nunha gala que se celebrará no Auditorio de Tenerife Adán Martín, que será retransmitida pola canle pública de televisión La 2, de RTVE..

'Unha inimiga do pobo', de Talía teatro, estreouse o 3 de marzo de 2023 no teatro Rosalía de Castro da Coruña. Marta Lado protagonizaba o espectáculo, no papel de Helena, unha doutora de prestixio internacional que regresa á vila natal para comezar unha nova etapa xunto ao seu compañeiro. Embarazada de cinco meses, afronta o seu novo estado coa ilusión por un novo proxecto profesional co balneario que ela mesma deseñou e que se presenta como un alternativa turística sostible e saudable. A inesperada contaminación das augas da zona e a súa loita por preservar a saúde da poboación fronte aos intereses económicos van colocala no punto de mira da veciñanza que ve como se pon en risco a prosperidade para toda a comunidade.