Espectáculos e concertos lembran a musicalidade de Luísa Villalta

A faceta musical de Luísa Villalta serve un punto de apoio a varias das accións culturais dedicadas a lembrar á homenaxeada deste ano polo Día das Letras Galegas facendo que a través da música poida presentarse a súa figura, obra e biografía. Hoxe mesmo, venres 10 de maio, o auditorio de Valdoviño acolle a presentación do espectáculo 'Tres mulleres na escuridade' da man de Soledad Felloza e a violinista rumana Irina Gruia que executan un encontro con Villalta poeta, escritora, dramaturga, ensaísta, feminista comprometida coa cultura e a vida. Felloza dá voz aos textos escollidos e Irina, en diálogo, executa distintas pezas a violín de compositores galegos e universais interactuando sobre os textos. A escuridade énchese de palabras e melodías, nunha viaxe ao universo lúcido e comprometido dunha creadora singular, cada verso, texto, melodía é un paso, un xogo que deixa atrás as sombras. O espectáculo chegará o vindeiro día 15 de maio á Biblioteca Ánxel casal de Santiago de Compostela.

Xuntando tamén a voz literaria da escritora coa música o Conservatorio Superior de Música de Vigo súmase ás celebracións do Día das Letras Galegas ofrecendo un concerto organizado desde o equipo de Dinamización da Lingua galega do Conservatorio o vindeiro día 14 de maio no Auditorio Martín Códax do centro. Neste evento alumnado e profesorado do CSM Vigo ademais do Coro e Orquestra Son das flores, en colaboración con los departamentos de Canto e Produción e Xestión, porán música e voz á obra de Villalta como homenaxe á autora que concibía a poesía como palabra melódica e que cultivaba a arte musical como violinista.



Alén disto, desde a escena musical do país tamén lévanse a cabo iniciativas como a presentada por A Banda da Loba. Esta formación ven de presentar un tema, co seu vídeo, dedicado á Luisa Villalta usando un dos seus textos como base e reivindicando dela o seu activismo. "E o mar" é unha homenaxe ao seu compromiso con diversas causas, representado este activismo na proposta visual a través de catástrofes ecolóxicas como os verquidos do Prestige ou a recente crise dos pellets plásticos.