O Festival de Títeres de Redondela fai 25 anos

Un total de setenta e tres actividades repartidas por trece escenarios compoñen o programa do Festival Internacional de Títeres de Redondela. A proposta celebra os seus 25 anos entre o 13 e o 19 de maio cunha edición na que conta con nomes coma o arxentino Sergio Mercurio, os italianos Di Filippo Marionette, os holandeses Lejo, Tangram Kollectiv de Alemaña, Théâtre Jaleo de Francia ou La Chana Teatro, gañadora dun Premio Max.

Canda a elas, compañías galegas como Alakrán, Xirapaus, Mircromina, Trécola, Viravolta, Paporrubio, Teatro ao Cubo ou Tanxarina fan parte dun programa no que tamén participan Mutis Teatro, de Segovia, o grupo andaluz El Espejo Negro, tamén recoñecido con varios Premios Max, o portugués Rui Sousa ou o Grupo Saltimbanqui, de México, ata un total de 28 compañías participantes.

No apartado expositivo, Títeres Alakrán protagoniza unha mostra na que compila pezas dos seus vinte anos de traballo. Entre as novidades desta xeira destaca a montaxe que levará polas rúas da vila un Aquiles animado de cinco metros de altura. No apartado musical, o programa conta con actuacións de Pulpiño Viascón, The Turre's Band, Cê Orquestra Pantasma ou Kedirán.