O Festival de Títeres de Redondela volta ás datas habituais nesta XXIII edición

Este trinta de abril abría as súas portas nos escaparates de Redondela a exposición a exposición 40 anos de Tanxarina Títeres, proposta que inicia o programa do XXIII Festival Internacional de Títeres de Redondela. O evento, que volta ás súas datas orixinais na primavera logo de dúas edicións en setembro por mor da pandemia, concentra a súa programación escénica entre os vindeiros 12 e 17 de maio.

A Asociación Xente Titiriberia, responsable da cita, anuncia que esta xeira contará con oitenta funcións e actividades nas que participarán trinta e unha compañías chegadas de Italia, Francia, Israel, Eslovenia ou Arxentina, ademais de España e Galicia. Ariel Doron, La Salamandre, Teatro Matita, Di Filippo Marionette, Maia Títeres e Boca de Cão compoñen a representación internacional. A eles súmanse desde España a Compañía de Víctor Biau, Teatro Mutis, Teatro Firulete, MG Producciones, que levará os seus "Monstros da Universal" polas rúas da vila e Birloque Títeres.

Os bonecos galegos estarán representados por Títeres Alakrán, Tanxarina Títeres, Mircromina Títeres, EducaTeatro, Viravolta Títeres, Cascanueces, Trécola, Paporrubio e Catropés. O programa inclúe ademais actuacións musicais a cargo de Paco Nogueiras, Uxía Lambona e a Banda Molona, Pakolas ou Cé orquestra pantasma, ademais de diferentes pasarrúas.

Como é habitual, a maior parte das actividade desenvolveranse nas rúas e prazas da localidade, que acollerán tamén unha nova xeira do Mercadiño Titiriteiro e mais a instalación Ingenii Machina a cargo de Alauda Teatro.