Torre de San Sadurniño. Foto: Jose Antonio Gil Martínez. FREECAT / Wikipedia
A semana pasada presentáronse en Cambados os resultados da prospección xeomagnética promovida pola Deputación de Pontevedra e realizada polo INCIPIT do CSIC no illote de San Sadurniño (Cambados). Os resultados revelan a densa ocupación do illote, no que canda unha gran estrutura rectangular identificada nas escavacións de 2001 como a posible capela que houbo na illa, apareceron na prospección magnética evidencia doutras estruturas que se corresponden coa ocupación galaica do castro. Os estudos tamén amosan a existencia dunha importante estrutura de combustión. A vontade do executivo local é tentar "musealizar" o illote.
