O que se esconde tralas fotos daquel verán

Durante moito tempo foi moi común, na ría de Arousa, facer excursións veraneiras ao illote de Guidoiro Areoso, na Illa de Arousa. A maior parte da xente descoñecía a riqueza arqueolóxica que gardaba o illote. Agora, un grupo de arqueólogos que analizan o proceso de degradación erosiva da illa solicitan as testemuñas gráficas realizadas polos turistas para coñecer como foi ese proceso de erosión no pasado.

Tres equipos de investigación traballando de xeito conxunto, o CSIC, a Universidade de Durham e o Grupo de Estudos para a Prehistoria do NW Ibérico da USC, están traballando no Illote de Areoso para coñecer como evoluciona a erosión do illote. A intervención non agresiva forma parte do proxeto eSCOPES (Evolving spaces: Coastal landscapes of the Neolithic in the European Land's ends) financiado pola Comisión Europea. Está dirixido por Elías López-Romero, da Universidade de Durham, e por Patricia Mañana-Borrazás (Incipit-CSIC). A iniciativa pretende comprender os axentes de cambio e erosión do Illote, non a recuperación ou salvación do seu legado arqueolóxico, aínda pendente.

Os investigadores tentan aproveitar a intensa ocupación turística do illote durante os meses de verán desde hai varias décadas. Unha práctica habitual na ría de Arousa era pasar o día en Areoso, disfrutando das praias, e volver a casa pola tardiña. Toda esa acción debeu xenerar numerosos materiais gráficos que informan, aínda que sexa de xeito secundario, da evolución erosiva do illote.

Para iso, os arqueológos dispuxeron catro soportes, un blog, un taboleiro de pins, unha páxina de Facebook e outra de Google +.

“O que pretendemos é promover a recuperación de información científica do illote. Para iso, pedimos á xente que teña visitado Areoso e que dispoña de materiais gráficos ao respecto que nolos envíen. Nós estamos realizando un seguemento da súa erosión desde 2013, pero precisamos obter unha secuencia temporal máis ampla. Iremos actualizando nas redes sociais para que todo o mundo poida ter acceso a eles", asegura Elías López-Romero.