As revoltas irmandiñas centrarán as IV Xornadas Pacegas

O Museo Pazo de Tor en Lugo acolle por cuarto ano as Xornadas Pacegas, un encontro científico dialogado arredor da civilización dos pazos e fortalezas trenzando a investigación académica coa acción cultural comprometida co patrimonio. Os vindeiros días 6 e 7 de maio a Rede Museística Provincial de Lugo convoca por cuarta vez este encontro baixo o tema das revoltas irmandiñas de 1467 e o seu impacto nos pazos de Tor e Narla, entendendo estes sucesos como determinantes para o nacemento dos pazos como as construcións que substituíron as torres e casas forte derrocadas polos insurrectos. Nun do dous bloques nos que se presentan estes encontros abordaranse as causas da destrución das fortalezas, a presenza feminina nos irmandiños, o papel xogado pola Igrexa e a posición da nobreza tralas revoltas. O segundo bloque será un monográfico sobre iconografía funeraria baixomedieval: damas e cabaleiros ante a morte. As xornadas están abertas a todo tipo de público que queira asistir. A inscrición debe realizarse vía email e o prazo de inscrición seguirá aberto ata o día 4 de maio ou completar o aforo, que é de 45 persoas.