Unhas xornadas do CSIC analizarán o mundo dos pazos

Os pazos, tempos e espazos vistos desde Tovar é o título das xornadas que organiza os vindeiros 7 e 8 de maio o Instituto de Estudios Galegos Padre Sarmiento do Centro Superior de Investigacións Científicas. O Pazo de Tovar, en Vilanova de Lourenzá, será a sede do encontro, que pretende analizar diferentes aspectos da cultura pacega no noso país. A presenza dos pazos na literatura, a economía e sociedade destes espazos ou o papel das mulleres nos mesmos son algúns dos temas que se abordarán. O encontro completarase con visitas guiadas ao Pazo de Tovar, que tamén protagonizará unha charla, e mais ao mosteiro de San Salvador de Lourenzá.