Escenas do Cambio celebra o seu décimo aniversario no Gaiás

A Xª edición do festival de artes escénicas Escenas do Cambio xa ten programa para celebrarse na Cidade da Cultura de Galicia entre os días 3 e 5 de maio baixo a dirección artística de Kirenia Martínez Acosta. Esta celebración dunha década incluirá de novo diversas propostas que teñen que ver coa danza, o teatro e as artes performativas, oito das trece pezas neste caso, preparadas para o lugar, que tentan crear un diálogo entre si e unha "conexión conceptual" entre elas. Tres destes espectáculos son de creación galega e dous deles estreas absolutas. Cris Vilariño e Diego M. Buceta lideran o primeiro, "Millo Vello", unha coprodución do Centro Coreaográfico Galego que desafía a desconexión acelerada da sociedade actual cun dúo de danza e batería. O segundo volverá desde Berlín con David Loira e Blondi. Unha peza de estética provocativa que confronta posturas políticas actuais con eventos históricos, buscando crear beleza en resposta ao rexeitamento e á discriminación. O terceiro chega da man de Yuraq Walla e Emilio Horyaans, que presentan Remix X, unha sesión de DJ e creación visual que recupera imaxes das edicións anteriores do festival. Ademais diso no festival estará tamén o Gallaecia Ensemble Barroco con CALIDOSCOPIO, Mateo Feijóo coa lectura do MANIFESTO e as bailarinas Clara Ferrao, Marcia Vázquez,Ana Beatriz Pérez e Raquel Ferradás en PRUSIK. Diversos espazos da Cidade da Cultura acollerán o esspectáculos, que tamén chegarán ás rúas da cidade vella de Santiago de Compostela nalgún dos casos.