Fotograma de Así falamos, así sentimos
As redes sociais Instagram e TikTok acollerán ao longo do mes de marzo o lanzamento dos seis episodios da serie Así falamos, así sentimos. O proxecto supón a adaptación á animación stop motion de Nabiza Girl, personaxe creado por Isabel Risco, da man da produtora Algarabía Animación e co apoio das axudas a proxectos culturais singulares da Deputación da Coruña.
A serie que agora se presenta nace "co obxectivo de reforzar a identidade galega entre a mocidade, cun ton natural e desenfadado", segundo salienta a presentación do proxecto. Cada un dos episodios do proxecto céntrase nun aspecto concreto da influencia que ten o galego sobre o castelán falado. Deste xeito chama "pór en valor a potencia expresiva do galego, mesmo en ámbitos que adoitan serlle hostil".
Reseso, Pota, Esnafrar, Esmagar, Cheirar ou Refugallo son os títulos de cada un destes capítulos. O primeiro deles publicouse este 15 de marzo e os seguintes chegan ás redes sábado 16, martes 18, venres 22, luns 25 e mércores 27. A produción conta con guión da propia Isabel Risco canda a Carlos Ares, dirección artística de Manel Cráneo e Marta Horjales, música de Tiruleque e atrezzo e decorados de Laura Blanco.
Esta adaptación súmase ás versións do personaxe en teatro, á serie de animación real que conta con nove capítulos publicados entre 2021 e 2022, e mais á banda deseñada Operación Breogán, publicada por Demo Editorial en 2023.
