Con Burro de Ay Teatro, abría o pano este 2 de marzo a XXIV Mostra de Teatro Clásico de Lugo. O programa achegará un total de dez obras ao Auditorio Municipal Gustavo Freire ata o vindeiro día 17. Logo da segunda función, Anónimo de Hilo Producciones, o día 4, a Mostra continuará a súa actividade este xoves 7 con Mañanas de abril y mayo de Teatro de Malta, que leva a escena unha comedia de Calderón de la Barca adaptada por Carolina África.
Vania Producións achega á cita El perro del hortelano, de Lope de Vega, adaptada e dirixida por Paco Mir este 8 de marzo. O Abre el ojo de Zorrilla chega ao palco da man de Noviembre Compañía de Teatro o día 9. Unha adaptación a títeres e teatro de obxectos de O Crebanoces, a partir do conto de Hoffmann, será a achega de Larraitz Producións Artísticas á cita no día 10.
A Companhia do Chapitô incorpora Shakespeare ao programa coa súa versión de Julio César o día 14, mentres Las Niñas de Cádiz atrévense cunha versión libérrima de As Bacantes baixo o título Las bingueras de Eurípides o 15. As últimas sesións da Mostra, os días 16 e 17 serán La Toffana de La Quintana Teatro, coproducida polo Centro Dramático Galego, e mais Esperando a Will de Egos Petits, que fechará o programa.
