Proa dunha embarcación tradicional. Fonte: GALP Golfo Ártabro Sur
A Asociación Os Patexeiros conseguiu 45.000 euros do Grupo de Acción Local e Pesqueiro Golfo Ártabro Sur para crear un ecomuseo de embarcacións tradicionais en Sada. A entidade prevé aproveitar estes fondos para construír un peirao flotante dedicado a este tipo de naves. Ademais, abordará a recreación dunha embarcación propia da zona, o coñecido como "bote de media construción".
Segundo explica o web de Os Patexeiros, este tipo de embarcación caracterízase por ter "pantoque planos e obra viva similar a un bote". A peza equiparase con tres tipos distintos de arboladura "para poder facer demostracións ao público dos distintos aparellos utilizados nas embarcacións tradicionais no golfo Ártabro: a vela latina, a vela de relinga e a vela cangrexa".
Tanto o peirao como o bote enmárcanse no proxecto do Ecomuseo a Flote, no que, segundo indica a presentación do mesmo, "se poidan visitar as embarcacións a flote e non dentro dun local". A primeira fase da actuación prevé desenvolver estudos de viabilidade e técnicos para o equipamento, no que a entidade prevé desenvolver diferentes actividades a divulgar as este patrimonio.
A proposta aprobada contempla ademais elaborar un inventario das embarcacións tradicionais existentes en Sada canda a diferentes materiais didácticos como audiovisuais en 360 grados ou unha recreación en realidade virtual da experiencia de navegación nunha nave deste tipo.
