Oito embarcacións tradicionais incorpóranse ao Censo de Patrimonio Cultural

O Decreto de 2019 que declaraba BIC as técnicas construtivas da carpintería de ribeira contemplaba a creación dun censo de embarcacións tradicionais e históricas, entendido como unha sección dentro do "Censo do patrimonio cultural de Galicia", que contemplara que "para o coñecemento e difusión das embarcacións que teñan a consideración de embarcación tradicional galega, así como promover outras medidas de fomento para a súa conservación e protección". Desta volta, no DOG de hoxe publícase a inscrición de oito embarcacións de diferentes puntos de Galicia. Xoulón (Bote de Ribadeo, Burela), Curuxán (Dorna cordeleira, Vilagarcía de Arousa), Lelia Doura (bote de media construción, Ferrol), Balbina (Lancha patexeira, Sada), Reina (Bote das Rías Altas, Ribeira), Nordesía (Bote das Rías Altas, Ferrol), Funqueira (Dorna polbeira, Vilagarcía de Arousa) e Canouro (Bote das Rías Altas, Ferrol). A Xunta indicou que nos vindeiros días iranse publicando as resolucións dos restantes barcos: Semparada, Falucheira, Fanequeira, A Marosa, A Oleira, Anguleiro, Madorniña, O Peixiño, Silvia Cristina, Mar de Muros, A Barola, Cormoráns de Ons, Chasula, Sara O e Casilda Un, ata un total de 23.