A Deputación de Pontevedra convoca axudas para patrimonio marítimo

A Deputación de Pontevedra convocou a terceira liña de subvencións para poñer en valor o patrimonio marítimo fluvial da provincia. Dotadas con 150.000 euros, estas axudas apoian traballos de "rehabilitación en embarcacións tradicionais (tratamento da embarcación, recuperación de determinadas partes deterioradas, reparacións, montaxe de electricidade, traballos de carenado e pintado, entre outros) co fin de recuperar o seu carácter orixinal ou de manter elementos estruturais que permitan a rehabilitación e o mantemento da embarcación".

A liña tamén apoia intervencións realizadas "sobre as distintas construcións e instalacións de terra (almacéns, fábricas, estaleiros, lonxas, casetas de pesca, embarcadoiros e pesqueiras, entre outras), mostras da arquitectura industrial e popular marítimo fluvial na provincia". Tanto estas como as embarcacións que conten con estas axudas deberán dedicarse a actividades de promoción sociocultural ou musealización.

Co prazo aberto ata o 2 de maio, esta convocatoria cobre ata o 80% dos custos destas tarefas cun máximo de dez mil euros, que se poderá ampliar se non se esgota a partida orzamentaria coas solicitudes recibidas.