A campaña de normalización Aquí tamén se fala chega a 150 centros de ensino

Centros de ensino de todo o país fan parte da campaña de normalización lingüística Aquí tamén se fala. Esta proposta, que fai do alumnado axentes a prol da nosa lingua, botou a andar no IES Rafael Dieste da Coruña e, desde a presentación do seu web e das súas redes sociais o pasado mes de decembro, conseguiu unha espectacular adhesión que chegou aos 150 centros participantes.

A campaña centra a súa acción na distribución de carteis co seu lema en comercios e locais abertos á atención ao público, distribuíndo en redes sociais imaxes de cada un destes establecementos coa imaxe da iniciativa. A previsión do proxecto, que se continúa a coordinar desde o IES Rafael Dieste, é chegar a distribuír ata 10.000 destes carteis no comezo deste 2024.

Canda a isto, o alumnado dos centros participantes realizan gravacións e entrevistas que se difunden nas redes. Nesta liña, desde este centro acaban de presentar outra iniciativa no seo do proxecto. Aquí tamén se canta pon nas redes gravacións de concertos acústicos de diferentes artistas do país. A cantante Lucía Aldao abre esta serie de vídeos.