Murguía, Manuel Curros Enríquez e outros amigos. Foto con cor dixital.
Neste ano 2023 celébrase o centenario da morte de Manuel Murguía e o Consello da Cultura Galega celebrouno onte cun recital e concerto no que se reivindica a alianza entre escritores e músicos no Rexudimento. "Nas ás do vento. Música e identidade no Rexurdimento" nace como concerto, pero tamén como especial web. Con artigos do filólogo Xurxo Martínez, especialista no Rexurdimento e a musicóloga Margarita Viso, coa voz de Anna Mélikhova e Martín Chaves ao piano, o proxecto permite coñecer e escoitar obras musicais realizadas polos grandes músicos e compositores do país no século XIX a partir dos textos dos escritores participantes no espertar cultural de Galicia na segunda metade do XIX. Desde a Cantiga de Curros musicada por Chané ou Maio Longo de Rosalía de Castro da man compositora de José Baldomir, ata catorce temas musicais. O proxecto completarase no futuro coa edición dun libro.
