A Asociación Cultural Barbantia deu a coñecer este 9 de decembro os fallos da XVII edición dos seus galardóns culturais. O escritor e filólogo Carlos Callón foi recoñecido co Premio da Cultura a nivel autonómico, mentres o recoñecemento a Traxectoria Cultural no Barbanza foi para o artista Xosé Luís Veiras Manteiga. O Centro Arqueolóxico do Barbanza, pola súa banda, recibiu o galardón á Iniciativa Cultural no Barbanza.
A Casa da Cultura de Lousame acollerá o vindeiro 16 de decembro o acto de entrega dos galardóns, nunha gala que se poderá seguir pola canle de Youtube da Asociación Barbantia a partir das 12.30 horas. No acto presentarase tamén o número 19 do Anuario de Estudos do Barbanza que edita este colectivo.
