A igrexa de Santa María do Burgo, situada no Concello de Castro Caldelas, acolle este 11 de novembro o acto de entrega dos primeiros Premios do Foro do Bo Burgo. O Concello e a Parroquia do Burgo organizan estes galardóns, que homenaxean "as persoas físicas e xurídicas que defenden a nosa lingua e as nosas tradicións, así como todo o que se relacione coas nosas terras e xente".
O premios nacen a coincidir co 795 aniversario do primeiro texto coñecido na nosa lingua, o Foro do Bo Burgo de Castro Caldelas, "como unha reivindicación da nosa lingua, por tal o recoñecemento de O Burgo e por extensión de Castro Caldelas como 'berce do galego'".
Unha peza da pintora caldelá Maite Vázquez constitúe a dotación destes premios, que na súa primeira xeira foron para o doutor Eduardo López Collazo, a Fundación Vicente Risco, a escritora Helena Villar Janeiro, o Arcebispo da Diócese de Santiago Monseñor Francisco José Prieto Fernández e mais a directora xeral de Patrimonio da Xunta de Galicia, María del Carmen Martínez Insua.
A Escola Municipal de Música e un concerto de Marcelo Dobode achegarán a ambientación musical a un acto no que o avogado e historiador Manuel Carrete realizará unha intervención. O evento finalizará cun magosto no pósito do Burgo.
