Aurichu Pereira. Fonte: Web da artista.
Este 1 de novembro falecía en Santiago de Compostela aos 83 anos Aurichu Pereira, pintora cunha destacada carreira no noso país. Discípula de Carlos Maside, completou a súa formación en Madrid, e nos anos 60 participou do movemento Estampa Galega e participou en diferentes exposicións colectivas da man de Luís Seoane e Reimundo Patiño.
Desde aquela desenvolveu ademais numerosas mostras individuais en diferentes galerías e salas de exposicións galegas. Ademais do seu labor pictórico realizou tamén proxectos no ámbito do deseño téxtil e de obxectos.
Alén do seu traballo artístico, mantivo unha activa militancia política e cultural e participou na fundación da Asociación O Galo en Compostela. Foi coñecida ademais por ser parella do político Xosé Manuel Beiras, con quen residía na localidade de Brión.
