Carmen Caramés. Fonte: AELG
O Concello de Pontevedra e Edicións Xerais daban a coñecer este 28 de setembro o fallo da terceira edición do premio literario Pinto e Maragota, que convocan coa intención de "visibilizar e dignificar a diversidade sexual e de xénero". Nesta xeira, o xurado seleccionou como vencedor o poemario Todo o que doe da escritora Carmen Caramés. O galardón conta cunha dotación de 3.000 euros en metálico.
O fallo destaca "a tenrura, a potencia das metáforas e a creación de atmosferas que evocan distintas sensación e emocións" da obra gañadora. Salienta tamén "a certeira representación da dificultade que supón, nesta historia, o amor entre dúas mulleres, fóra das normas establecidas, así como a reivindicación do dereito a vivir o amor en liberdade".
O xurado, que estivo composto Cristina Barreiro, Miguel Calvo Marques e Sara Vila, salientou tamén a calidade da novela para público adulto presentada co título Os tres nomes da Sartegua e a obra xuvenil A campá dos Tararíns, das que recomendou a publiación.
En total presentáronse a esta edición do certame, aberto a diferentes xéneros literarios, un total de 23 obras, das que sete pertencían á categoría de literatura infantil e xuvenil, cinco foron novelas para público adulto, dúas obras de teatro e as outras nove, poemarios para público adulto.
