Carme P.G. Granxeiro faise co II Premio Literario Pinto e Maragota de Pontevedra

Carme P.G. Granxeiro proclamouse gañadora da II edición do Premio Literario Pinto e Maragota pola Diversidade de Sexo e Xénero do Concello de Pontevedra. Grazas á súa obra 'Estranxeiras' obtivo a maioría dos votos do xurado entre os 27 traballos recibidos neste certame. O Premio está organizado pola Concellería de Igualdade en colaboración con Edicións Xerais de Galicia e ten unha unha dotación económica de 3.000 euros e a publicación da obra. O Premio Pinto e Maragota "está destinado a visibilizar e dignificar a diversidade de sexo e de xénero"

O xurado destacou na obra gañadora o feito de ser "unha representación LGBTIQA realizada con sensibilidade, na que se reclama o rural como un espazo de liberdade e reivindicación", ao tempo que valorou "a dignificación das relacións interxeracionais presentes na novela" e "o emprego de novas formas de linguaxe, como a utilización do pronome neutro". "Tamén valoraron a construción coral de personaxes, cunha interesante galería de personaxes secundarios tratados con sensibilidade e delicadeza. Para o xurado, 'Estranxeiras' é unha obra de lectura áxil, apta para un público amplo, con referentes á cultura LGBTIQA+ en libros, filmes, música… Presentes ao longo da obra", segundo apuntou a edil de Igualdade.