O Teatro Principal de Ourense acollía este 26 de setembro a presentación dá décima sexta edición do FITO. O Festival Internacional de Teatro de Ourense volta á cidade entre o 12 e o 22 de outubro co foco posto na compañías emerxentes, segundo sinalou a organización. O Teatro Principal, o Liceo de Ourense, a Casa da Cultura Manuel María de Barbadás, e diferentes rúas da cidade acollerán as actuacións desta xeira.
Segundo asegurou a directora do evento, Fina Calleja, a programación de compañías galegas será máis diversa ca nunca. Contra-producións con Entrega en man e Redrum Teatro co seu O pequeno poni representarán o teatro textual, mentres Quico Cadaval abordará a narración oral. Marta Alonso achegará danza ao programa con Sofá e Pajarito desenvolverá a súa proposta de clown. A compañía A Feroz, pola súa banda, estreará a montaxe de máscaras Frío.
De fóra de Galicia o programa contará co catalán Inda Pereda, que presenta a montaxe El viaje del héroe, a compañía portuguesa Escola da Noite con Un homem no caminho, e a proposta canadiana de clown Dado.
De xeito paralelo ao programa o festival convoca a terceira edición das bolsas de creación 67 Graos. Ourense Efervescénica para promover "o diálogo entre creadores e a aperta de xéneros e disciplinas artísticas". Cada unha destas bolsas conta cunha dotación de 300 euros.
