Dous roteiros lembraran ao poeta e activista Paco Souto

A Deputación Provincial da Coruña xunto coa Editorial Caldeirón organizan este mes dous roteiros como homenaxe ao escritor, editor e activista Paco Souto (A Coruña, 1962 - 2017). Os roteiros terán lugar o 16 de setembro en Malpica e o 30 do mesmo mes en Santiago de Compostela, neles participarán poetas como Xosé Iglesias e Rosalía Fernández Rial que lerán textos do autor. Os dous roteiros estarán guiadas por Miro Villar (escritor e amigo do autor homenaxeado) e finalizan coa actuación musical de Serxio Moreira.

O poeta, editor e activista político e cultural Paco Souto, falecía fai case seis anos nun accidente mentres estaba a faenar recollendo percebes na costa de Razo, Carballo. Souto era o responsable de iniciativas como a Colección Caldeirón e foi un dos promotores de iniciativas históricas como Letras da Cal ou Edicións do Dragón e membro do Batallón Literario da Costa da Morte. A súa obra, centrada fundamentalmente na poesía, abrangue obras como 'As árvores do incesto', galardoada co Premio Espiral Maior, 'As horas de María', polo que levou o Johán Carballeira ou 'E caín'. De xeito póstumo publicouse no 2019, 'Luz de incendios', un poemario con acompañamento musical. Ademais, desenvolveu un intenso labor dinamizador na Costa da Morte á fronte da Asociación Caldeirón.