Falece o poeta e activista cultural Paco Souto

O poeta, editor e activista político e cultural Paco Souto, nado na Coruña en 1962, falecía onte. Un accidente mentres estaba a faenar recollendo percebes na costa de Razo, Carballo, semella ter sido a causa da morte. Souto era o responsable de iniciativas como a Colección Caldeirón e foi un dos promotores de iniciativas históricas como Letras da Cal ou Edicións do Dragón e membro do Batallón Literario da Costa da Morte. A súa obra, centrada fundamentalmente na poesía, abrangue obras como As árvores do incesto, galardoada co Premio Espiral Maior, As horas de María, polo que levou o Johán Carballeira ou, aínda no pasado outono, o máis recente E caín. Ademais, desenvolveu un intenso labor dinamizador na Costa da Morte á fronte da Asociación Caldeirón. O Tanatorio de Malpica acollerá hoxe, ás 15.15 horas, un acto cívico de homenaxe.