O mural que decora a estación ferroviaria de Monforte e que representa as liñas de tren galegas a mediados do século XX está a sufrir traballos de restauración. A empresa ADIF, que xestiona as infraestruturas ferroviarias a nivel estatal, encargou este labor logo da reclamación que presentara a Asociación para a Defensa do Patrimonio Cultural Galego, que destacaba o valor histórico desta peza.
Segundo publica La Voz de Galicia, a peza foi pintada en 1954 por Cándido Fernández Inchaurbe, delineante de Renfe, a coincidir con obras de ampliación da estación. Para alén do trazado de vías entón existente no país, representa estacións e elementos destacados das localidades comunicadas por ferrocarril naquel entón.
