Lorca volve a Compostela

Federico García Lorca visitou Santiago de Compostela en varias ocasións, a última delas en 1932. Tamén percorreu outras cidades galegas, ben como conferenciante ou como membro de La Barraca, a lendaria compañía teatral da República. Para conmemorar ese frutífero paso, do que ficou abondosa memoria e a incursión do poeta na creación poética en lingua galega, o Consorcio de Santiago inaugurou na Casa do Cabido a exposición "Lorca en Compostela". Con máis de 80 pezas, entre as que figuran manuscritos, debuxos, fotografías ou audios, entre outros, o comisario da mostra, o xornalista e editor Henrique Alvarellos, traza os pasos e o impacto do poeta en Galicia e en Compostela. A mostra permite ver debuxos realizados por Lorca no Hotel Compostela en 1932, un vídeo da xira de La Barraca por Galicia ou diferentes manuscritos.