A Xunta licita restauracións en edificios eclesiásticos por valor de 618.225 euros

A plataforma Contratos de Galicia dá conta de tres novos procesos para licitar traballos de rehabilitación en tres edificios eclesiásticos do noso país. En total, a Xunta de Galicia investirá 618.225 euros en obras que afectarán á igrexa de Santa María de Sacos, en Cerdedo-Cotobade, San Pedro de Correxais, en Vilamartín de Valdeorras, e a Capela da Soidade da Venerable Orde Terceira en Lugo.

O templo de Sacos será o que reciba un maior investimento, cun contrato de ata 304.289 euros destinado a obras de restauración. As mesmas afectarán á renovación da cuberta, melloras na drenaxe perimetral, limpeza de fachadas, eliminación de sales da pedra e de revocados de cemento, así como o recambio das carpintarías exteriores, actuacións todas elas destinadas a eliminar humidades e condensacións no edificio. Ademais, substituirase a actual tribuna de formigón e mais das portas actuais por pezas de madeira.

A igrexa de igrexa de San Pedro de Correxais, Vilamartín de Valdeorras, verá pola súa banda traballos de restauración das bóvedas de cruzaría elaboradas en madeira das capelas laterais do cruceiro por valor de 127.160 euros. As actuacións inclúen fixación, consolidación e protección da policromía, limpeza, melloras estruturais para garantir a consistencia do conxunto, e mesmo reconstrucións parciais, con reproducións de elementos perdidos.

Na capela da Soidade da Venerable Orde Terceira en Lugo as obras afectarán á restauración do pavimento e á eliminación de humidades, cun orzamento de 186.776 euros. Para alén de substituír o pavimento actual, realizarase unha nova revocadura de morteiro de cal nos muros, mudaranse as carpintarías e mellorarase a drenaxe deste espazo. Tamén se realizarán catas para verificar a existencia de pinturas murais no conxunto e mais comprobar o potencial arqueolóxico da área de actuación.