O Día dos Arquivos achega estes centros de documentación ao público

A coincidir coa celebración este nove de xuño do Día Internacional dos Arquivos, a Xunta de Galicia anuncia unha trintena de actividades para achegar ao público o traballo dos cinco centros de documentación que xestiona. Deste xeito, visitas teatralizadas, xornadas de portas abertas, dúas novas exposicións, obradoiros e conferencias fan parte da celebración da efeméride.

No Arquivo do Reino de Galicia, na Coruña, as propostas inclúen entre os días 8 e 12 visitas guiadas e a posta a disposición do público e novos documentos manuscritos de Emilia Pardo Bazán e Rosalía de Castro integrados fondo documental da Familia Carré Aldao e Carré Alvarellos.

O Arquivo Histórico Provincial de Lugo, pola súa banda, celebra a xornada cunha semana de portas abertas que arrincou este día 6 e continúa ata o 9. Unha conferencia de Estefanía Iglesias antigas ferrerías e a exposición de fotografías antigas de José Luis de Vega fan parte das actividades.

En Ourense, visitas teatralizadas sobre a orde dos franciscanos, cuxo convento alberga agora o Arquivo Histórico Provincial, desenvólvense ao longo de toda a semana. O 9 de xuño o local acollerá un obradoiro de caligrafía medieval para adultos.
Pontevedra, pola súa banda, abrirá o día 9 a exposición A arquitectura da auga, que se acompaña dunha conferencia da doutora Elvira Lindoso Tato sobre construcións como balnearios, muíños ou lavadoiros.

O Arquivo de Galicia, na Cidade da Cultura, propón pola súa banda a exposición De comerciantes e banqueiros. Orixes da banca en Galicia "que se achega o fenómeno da actividade bancaria na Comunidade nunha época de profundas transformacións entre as que destaca o inicio do movemento emigratorio a grande escala a mediados do século XIX". A mostra abre do 9 de xuño ao 15 de outubro e contará con visitas guiadas. Ademais, o centro desenvolverá unha xornada de portas abertas entre o 12 e o 16 de xuño.