Un roteiro segue os pasos do Seminario de Estudos Galegos pola Terra de Melide

O Consello da Cultura Galega e o Museo Terra de Melide organizan para o sábado 10 de xuño o roteiro "Tras as pegadas do Seminario de Estudos Galegos na Terra de Melide". O roteiro irá tras os pasos do grupo de intelectuais que en 1933 documentou, nunha serie de traballos pioneiros, a arte, etnografía, territorio, música e arqueoloxía da comarca de Melide e deu lugar a unha publicación pioneira. No roteiro a asociación Herba Grileira interpretará pezas musicais recollidas polos membros do Seminario de Estudos Galegos. O itinerario contemplará varias localizacións arqueolóxicas e artísticas de Toques e unha visita polo casco urbano de Melide. A inscrición é obrigatoria e de balde a través do Museo Terra de Melide.