A literatura protagoniza o VII Simposium Monte Pindo

A Asociación Monte Pindo Parque Natural organiza este sábado 3 de xuño o VII Simposium Monte Pindo. Centrado nesta xeira nas letras, o encontro "reflexionará encol da literatura que ao longo dos séculos, tamén nos últimos anos, se ten escrito arredor do Olimpo Celta", segundo explica a organización. O Pósito do Pindo acollerá o programa, de entrada libre.

No encontro inclúense palestras como a do xeólogo Juan Ramón Vidal Romaní sobre "A Lito-literatura do Pindo". Mª Esther Barreiro Fernández falará encol do Monte Pindo e as terras de Carnota na obra de José Barreiro Barral, mentres Francisco X. Fernández Naval abordará As fontes do Pedregal.

Guadalupe Vázquez Formoso, con Monte Pindo: a máxia inspiradora e Laura Suárez cun relatorio sobre Descubrindo o Monte Pindo na man da literatura infantil galega, fan tamén parte dun programa que fecha cun coloquio entre as persoas participantes.