Desde o pasado 11 de maio e ata o vindeiro 2 de novembro está aberta a convocatoria de subvencións para a participación de persoas escritoras, ilustradoras, tradutoras e editoras nas actividades que se celebren no sector do libro. Esta liña de axudas da Xunta conta cun orzamento total de 30.000 euros.
A nova convocatoria presenta a novidade de incorporar ás persoas profesionais da edición a estas axudas, que ata o momento estaban limitadas a escritoras, ilustradoras e tradutoras. Cada solicitude concedida permitirá contar cunha axuda 500 euros para asistir a "feiras, festivais, seminarios, encontros, obradoiros e estadías creativas" a nivel estatal.
A contía increméntase a 900 para eventos realizados en Europa ou países ribeiregos do Mediterráneo, e chega a 1.600 euros para actividades no resto do mundo. As axudas incrementan a súa contía a respecto da última convocatoria.
