Abren ao público as galerías do Castro en Vigo

Logo dun prolongado traballo de recuperación e de musealización, o Concello de Vigo activaba este 15 de maio o servizo de reservas para coñecer as galerías do Castro. Este conxunto defensivo é accesible por vez primeira ao público mediante un programa de visitas guiadas e gratuítas para o que xa se pode solicitar praza e que se prolongará ata o 26 de maio.

Nas visitas, para alén de percorrer os máis de 60 metros de galerías subterráneas do conxunto, proxeccións audiovisuais e paneis expositivos permiten coñecer polo miúdo esta fortaleza e feitos históricos vencellados a ela como o bombardeo de 1719 ou a batalla de Rande. Os traballos de musealización permitiron recuperar tamén como espazo expositivo o antigo polvorín do complexo.

Para o verán está prevista a apertura ao público xeral deste conxunto histórico. O conxunto de galerías e fortificacións que se conservan na actualidade datan dos séculos XVII e XVIII e foron construídas sobre unha fortaleza medieval situada no mesmo emprazamento.