Coa apertura da exposición Radio Blitzkrieg do ilustrador Álvaro P-FF bota a andar en Vigo na tarde deste 18 de abril o festival Creativa. A revista Dot e a Galería Maraca coordinan este programa multidisciplinar que reúne unha corentena de nomes de diferentes ámbitos creativos.
Ata o vindeiro 5 de maio a Galería Maraca, o MARCO, o Espazo Rio Lagares, La contenedora e o Ateneo Atlántico acollen as actividades deste encontro, que pretende "achegar a cultura a novos públicos, a expandir os seus límites, tanto espaciais como conceptuais".
No programa intégranse charlas, exposicións e concertos da man de nomes destacados como Carlos Galán, fundador do selo discográfico Subterfuge Records, ilustradores como Aitor Saraiba ou Javirroyo, o director de animación Alberto Vázquez, o artista urbano Basket of Nean, o equipo de deseño As Peaky Branders ou proxectos musicais como Lúa Mosquetera, Juanma Lodo, Røâl ou r.A.r.O.
O cartel inclúe tamén a proxección do documental Bienvenido Mr. Banksy e obradoiros de escrita creativa, serigrafía, colaxe e caligrafía. Todas as actividades do programa son de balde.
