Corenta e dúas empresas reparten as axudas do fondo tecnolóxico do Hub audiovisual

Un total de 42 empresas do audiovisual, a música, as artes escénicas, a loxística e a produción de espectáculos repartiron os dous millóns de euros das Axudas á dotación de equipamentos e activos que convocou o Hub Audiovisual da Xunta. Esta convocatoria, dotada con dous millóns de euros apoia a incorporación de bens que "fomenten a innovación e competitividade da industria cultural e creativa galega".

O director da Axencia Galega das Industrias Culturais, Jacobo Sutil, visitaba este 3 de abril as instalacións do estudios de dobraxe Cinemar no polígono Novo Milladoiro, en Ames. A empresa foi unha das máis beneficiadas desta convocatoria ao acadar un apoio de 96.800 euros que investiron na mellora de tres das súas salas de traballo.

Na resolución desta convocatoria, que cobre ata o 80% do gasto subvencionable, conseguiron contías de 100.000 euros a produtora CTV, Kachet Loxística e mais Viva Zapata & Villar. Tex45 producións, con 99.984 euros, Sete e media (95.000),Cinemar Films (96.862) e Igmar Servizos Acústicos (92.948) foron as outras entidades máis beneficiadas por esta liña de axudas.

Canda a elas, Emsac, Tex45, Work on Sunday, Ainé, Ficción, PlayPlan Cultural, Undodez, Gaita Films, Nalgures, Zeitun Films, Chiripa, Mondotropo, Etiqueta Negra, Miramemira, Producións Teatrais Excéntricas, Tanxarina, Abano ou Pistacatro foron outras das firmas que recibiron estes apoios.