O Consello da Xunta ven de dar luz verde a unha nova liña de subvencións ao abeiro do Hub audiovisual da industria cultural, que desta volta activa un fondo de 1,3 millóns de euros para impulsar a modernización e a competitividade do conxunto do sector cultural galego mediante a adquisición de equipamentos técnicos por parte de empresas privadas e traballadores autónomos. En concreto, está prevista a concesión de ata 100.000 euros por cada proposta subvencionada para a compra de equipamentos e outros activos fixos materiais vinculados á actividade principal do solicitante, de activos fixos inmateriais, como a activación de Licenzas informáticas destinadas ao proceso produtivo, ou de servizos de software, así como para a adecuación dos espazos físicos cara á instalación dos equipamentos.
O financiamento para estas axudas parte do Fondo Europeo de Desenvolvemento Rexional (Feder) dentro do eixe REACT-UE. A intensidade da axuda poderá alcanzar o 80% do gasto subvencionable dos proxectos de investimento beneficiarios, que deberán ter un orzamento mínimo de 25.000 euros en cada caso. Esta convocatoria extraordinaria será publicada proximamente no Diario Oficial de Galicia e a ela poderán optar, en réxime de concorrencia non competitiva, tanto persoas físicas (autónomas) como empresas privadas que desenvolvan a súa actividade principal de xeito habitual en Galicia. O raio de acción esténdese á meirande parte dos ámbitos culturais, coa excepción das salas de cine, de artes escénicas ou de música, que xa contan con liñas especificas de subvencións neste mesmo sentido.