O Concello de Ponteareas deu a coñecer este 31 de marzo o fallo do IX Premio de Investigación Fermín Bouza Brey. O xurado seleccionou a proposta de investigación que presentou Roberto Mera para elaborar unha biografía sobre Amado Garra Castellanzuelo. O xurado destacou que este é "un interesantísimo proxecto biográfico" encol da figura deste ponteareán. O gañador disporá agora de seis meses e de 3.000 euros en metálico para desenvolver a súa proposta.
O fallo destaca ademais o carácter inédito do proxecto xa que ata o momento só existen publicacións sobre aspectos puntuais da vida de Garra na forma de artigos. Este avogado e xornalista foi un dos principais dirixentes do agrarismo e líder do republicanismo na provincia de Pontevedra no comezo do século XX.
O xurado destaca que o proxecto de Mera "permitirá coñecer máis os movementos sociopolíticos transcendentais no primeiro terzo do século XX, como foron o agrarismo, o republicanismo, o xornalismo como ferramenta propagandística ou as relacións con Portugal, dinámicas das que Ponteareas, a través de Amado Garra, foi un dos seus epicentros".
Mera proponse facer un repaso das fontes de información sobre este persoeiro, cun particular peso da hemerográficas, ademais de visitas a arquivos de Portugal, Galicia e outros lugares do Estado onde existe información encol da figura. O xurado do certame estivo composto por Clodio González, Silvestre Gómez Xurxo, Pablo S. Otero Piñeyro Maseda, Alfonso Caride, Gonzalo Fernández e Fernando Groba.
