Ambición internacional no cartel de O Son do Camiño

O festival O Son Do Camiño ven presentar o seu cartel completo para este 2023 na que será a súa cuarta edición entre o 15 e o 17 de xuño. Polos escenarios do recinto do Monte do Gozo da capital galega pasarán máis de 50 artistas durante eses tres días cunha forte aposta pola presenza de nomes da escena internacional como gran reclamo e unha diversidade ecléctica de estilos para varios gustos. Así, entre os nomes máis coñecidos da parte alta do cartel está o arxentino Bizarrap, o colombiano Maluma, os británicos Alt-J, The Kooks, o dúo Royal Blood na súa primeira visita a Galicia, os australianos Wolfmother, Kaiser Chiefs, o rapero arxentino Trueno. o produtor sueco Steve Angello ou a domonicana Tokischa, entre outros. Ademais haberá tamén presenza da escena nacional con artistas como Leiva , Aitana, Xoel López, WOS ou Vetusta Morla e haberá algún espazo para propostas da escena galega como Fillas de Cassandra, The Rapants e Sila Lua ademais de outros artistas dentro do programa de sesións Dj, como Babykatze, Bárbara Lago, Groove Amigos ou Galician Army.

Con este cartel o Son do Camiño amosa a súa máxima ambición resultando homologable na súa oferta a outras das grandes citas deste tipo e tamaño na península. O festival promovido pola empresa galega Esmerarte Industrias Creativas xunto con Bring The Noise, conta co "apoio activo" da Xunta de Galicia e o Xacobeo. Antes de presentar cartel xa fixo unha venda de abonos colocando ata 33.000 en poucas horas. Mañá, venres, ás 12:30 horas sairán a venda o resto de abonos dispoñibles, quedando para máis adiante a venda de entradas por días. O recinto do Monte do Gozo está preparado para albergar ata 100.000 persoas e, segundo o anuario da APM, pola pasada edición do festival en Santiago pasaron ata 115.000 asistentes nos tres días do evento. O Festival O Son do Camiño levou o premio a mellor festival español en canto a Comunicación & Estratexia de marketing nos pasados Premios Iberian Fest.