Imaxe da acción O canto da subasta en Porto do Son. Fonte: Fundación Seoane.
Desde o pasado 4 de marzo e ata o 3 de setembro, a sede da Fundación Seoane, na Coruña, acolle a exposición Redes do País. A mostra recolle traballos que a artista alemá Antje Schiffers e a dramaturga e comisaria húngara Katalin Erdödi desenvolveron no marco do proxecto Collaborative Village Play.
Esta iniciativa desenvolveu en diferentes localidades rurais de Europa "unha creación artística colectiva" a integrar "os puntos de vista, as formas de vida e o relato directo dos seus habitantes" segundo explica a Fundación. "Os traballos, as tradicións, as festas e celebracións, con especial atención aos xeitos de produción locais, protagonizan unha proposta que busca o recoñecemento e a supervivencia dun legado produtivo e cultural que constituíu durante séculos a base económica e social de gran parte do territorio europeo, e que tras o abandono progresivo do campo desde os anos 50, loita por evitar a súa desaparición e reivindicar o seu legado".
Con comisariado de Manuel Olveira, a exposición reúne as obras e obxectos producidos durante os tres procesos deste proxecto, en Nagykaramás (Hungría), Bostelwiebeck (Alemania) e Porto do Son (A Coruña). Canda a isto, o proxecto inclúe documentación audiovisual que permite seguir as diferentes achegas dos veciños a estas accións. Cuestións como a continuidade das formas de vida tradicionais no ámbito rural, a loita contra a corrupción ou a sustentabilidade da pesca collen forma en diferentes obras realizadas de xeito colectivo polos habitantes de cada localidade.
