Antía Cal nun fotograma de "Regalo de Memoria'
A mestra e pedagoga Antía Cal (A Habana 1923) deixábanos o pasado mes de marzo deste 2022 falecendo en Moaña con 98 anos. O Ministerio de Educación e Formación Profesional ven de incluíla, a título póstumo, entre as "21 figuras imprescindibles e inspiradoras" ás que outorgar as condecoracións da Orden Civil de Alfonso X o Sabio. Estas distincións recoñecen a contribución de persoas o entidades aos campos da educación, a ciencia, a cultura, a docencia e a investigación. No caso da insigne pedagoga galega, o Ministerio recoñece nela "a muller que quixo revolucionar a educación desde a escola nos tempos da longa noite de pedra do franquismo, que contra vento e marea foi a precursora da escola do século XXI en Galicia, unha escola laica, mixta, igualitaria e aberta", segundo destacou o secretario de Estado de Educación, José Manuel Bar, durante a cerimonia de entrega das condecoracións. O galardón foi recollido polo fillo de Antía Cal, Hixinio Ultreia Beiras Cal, en nome da familia.
