Xesús Alonso Montero. Fonte: RAG
O filólogo Xesús Alonso Montero foi galardoado co Premio Laxeiro 2023. O padroado da entidade daba a coñecer este 1 de decembro o acordo unánime polo que recoñecen o profesor e investigador co máximo galardón da entidade. O acto de entrega celebrarase o vindeiro 23 de febreiro.
Alonso Montero, considerado un dos principais investigadores sobre a nosa literatura, é catedrático emérito de Literatura Galega ademais membro e antigo presidente da Real Academia Galega. Segundo destaca o fallo do xurado, trátase "dun dos ensaístas máis importantes e notables de Galicia das últimas décadas" e sinala que "a cultura e desenvolvemento cultural de Galicia na segunda metade do século XX e no primeiro cuarto do século XXI están exemplificados en Xesús Alonso Montero".
