Eduardo Castro Bal (Ollo de Vidro-ACAB) (2015). AELG
Por vez primeira, a Federación Galiza Cultura daba a coñecer onte o fallo do seu Premio Nacional, que foi para Francisco Rodríguez. Segundo explicou Pilar García Negro, presidenta da Federación, o galardón recoñece unha traxectoria poliédrica que combina a investigación filolóxica e literaria, con achegas destacadas sobre a figura de Rosalía de Castro, cunha continua militancia de base en diferentes colectivos e un labor político como parlamentario e deputado no que tamén estivo presente a defensa da cultura do país. Co lema "50 anos ao servizo da cultura galega", o vindeiro 22 de abril en Ferrol celebrarase un xantar aberto a todos os interesados no que o galardoado recollerá o premio.
Ás entidades que fan parte da federación, con nomes como O Galo, Alexandre Bóveda, O Castro, Altofalante, Maio Longo ou Auriense adheríronse no recoñecemento unha trintena de colectivos culturais de todo país, entre eles a Asociación de Escritoras e Escritores en Lingua Galega, a Asociación Socio-Pedagóxica Galega, a Confederación Intersindical Galega‑Ensino, a Fundación Galiza Sempre ou A Mesa pola Normalización Lingüística.
