Anxo Quintela é galardoado co Premio Nacional de Xornalismo Cultural

Por segundo ano consecutivo, o Premio Nacional de Xornalismo Cultural que outorga o Ministerio de Cultura vai para unha traxectoria profesional galega. Anxo Quintela (Vigo, 1960) foi seleccionado polo xurado como merecente deste galardón, dotado con 20.000 euros. O fallo destaca a traxectoria do comunicador "en múltiples campos do xornalismo cultural en lingua galega: na Radio Galega -Diario Cultural- e en TVG -O Agro-. Pola súa continuada implicación no coñecemento e a difusión da cultura rural -ás veces desatendidas- a contribuír á súa leiximitación como parte da cultura en sentido amplo". Quintela sucede no galardón a Ana Romaní, recoñecida o ano pasado.

O xurado estivo presidido por Olvido García Valdés, directora do Libro e Fomento da Lectura, con Begoña Cerro Prada, subdirectora xeral de Promoción do Libro, a Lectura e as Letras Españolas como vicepresidenta. Canda a elas fixeron parte do comité Ana Romaní, Marilar Aleixandre a representar a RAG, Félix Ibargutxi Otermin desde a Euskaltzaindia, Pilar Castro Pérez da Asociación Española de Críticos Literarios, Luis Menéndez Villalva da Federación de Asociacións de Xornalistas de España, María Carmen Asenjo Pinilla a representar a Asociación de Revistas Culturais Españolas, Miguel Ors Montenegro da Conferencia de Reitores das Universidades Españolas, Manuel Castro Mengíbar da Federación de Asociacións de Radio e Televisión de España, e Yanna Gutiérrez Franco, do Instituto de Investigacións Feministas da Universidade Complutense de Madrid.