A Xunta creará un Observatorio da Innovación do Patrimonio Cultural

No marco da celebración do Día do Patrimonio Mundial o conselleiro e Cultura, Educación, FP e Universidades, Román Rodríguez, anunciou a intención da Xunta de Galicia de crear o Observatorio da Innovación do Patrimonio Cultural. Tal e como explicou o representante autonómico, o obxectivo desta nova ferramenta será coñecer as iniciativas de carácter público e privado que se centren en abordar o patrimonio cultural galego desde un enfoque innovador. O conselleiro fixo alusión aos traballos de restauración realizados na Catedral de Santiago e as técnicas neles empregadas, como exemplo da actuación sobre o patrimonio con características anovadoras. Así, a través deste observatorio detectaranse as boas prácticas arredor do patrimonio material e inmaterial de Galicia e impulsaranse a valoración e a sustentabilidade das intervencións realizadas e a súa difusión. Rodríguez asegurou que os orzamentos do vindeiro ano contarán cun incremento do 14% nas contas destinadas á conservación, restauración, investigación e divulgación de bens patrimoniais, encadrando este novo organismo nesa liña de traballo do goberno autonómico respecto ao patrimonio. Non se deron detalles sobre a composición, procedementos e funcionamento deste novo Observatorio da Innovación do Patrimonio Cultural.