Carlos Valle é recoñecido co premio Pedra do Destino

O antigo director do Museo de Pontevedra, Carlos Valle, recolleu este 12 de novembro na capital do Lérez o Premio Pedra de Destino. A Asociación de Amigos dos Museos de Galicia quixo recoñecer con esta homenaxe "a súa exemplar traxectoria á fronte desta institución" e mais os méritos de Valle "en defensa e divulgación do patrimonio cultural de Galicia".

A entrega do premio, que salienta o papel do Museo como "institución referente pola súa actividade e compromiso coa cultura galega e con canto implica un museo" realizouse na sede da Fundación Fundación Cuña - Casasbellas. O galardón consiste nun diploma e incluíu a edición do libro A obra de Castelao no Museo de Pontevedra, que estuda un legado "que corría o risco de perderse para o legado cultural de Galicia".