Stracciatella Teatro estrea este domingo 'O Refuxiado'

Resulta pouco habitual a estrea en domingo dunha produción teatral e máis con entrada libre, pero así será no caso de 'O Refuxiado'. A produción da compañía Stracciatella Teatro levantará o pano este 13 de novembro no Auditorio Pintor Llorens de Sada ás 20 horas na que será a súa estrea absoluta. Está é a segunda montaxe desta recente compañía teatral creada por Iria Lamas, Javier F. Mariño e Marcos Fernández. A montaxe está dirixida por Xosé Luís Prieto e conta no reparto con Alejandro Carro, Iria Lamas Alsina e o propio autor da dramaturxia, Andrés Mahía. Esta obra ten música en directo e elabora unha aposta pola sustentabilidade, a través da creación dunha escenografía feita totalmente con cartón reciclable.

A obra preséntase como "Unha comedia, sobre o triste que é todo". 'O refuxiado' conta a historia dun político ambicioso, sen escrúpulos nin cultura, que acepta o consello do seu audaz xefe de gabinete para solucionar un inminente proceso por corrupción: acoller un refuxiado na casa. En lugar dun presunto delincuente, será un home con conciencia. A esposa e a filla do político, vórtices nun fogar convulso, xogarán tamén un papel ante a opinión pública. A solidariedade, a traxedia, a crueldade e a miseria, convértense en vimbios cos que fabricar unha balsa na que fuxir da propia pobreza moral. Unha balsa ou unha soga. O autor tamén é guionista en produtos televisivos que poden ser coñecidos, como as series Terras de Miranda, Era Visto, Air Galicia ou As leis de Celavella O director, José Luís Prieto, foi o escritor da adaptación teatral de Fariña, da obra Recortes e de 'Somos Criminais'.